elikaduraz
DESCRIPTION
ElikadurakTRANSCRIPT
XXI. MENDEKO EUSKALDUNON ELKARTEAK
ELIKADURA ARTIKULATZEKO PLANA
Ezagutzaren transferentzia artikulatzeko markoa
Topagunea, 2012ko apirila
1. SARRERA
Mondragon Unibertsitateko HUHEZI fakultatea, Sorguneak izeneko ikertegiaren
eskutik, bidelagun izan du Euskara Elkarteen mugimenduak 2010ean jorratu duen
bidean. Eragile hauek helburu izan dute euskaltzaleon gizarte mugimendu honen
aurrera begirako ildo nagusiak finkatzea diagnostiko on batean oin hartuta. Horren
emaitza Bilbon egindako jardunaldia izan zen: http://kongresua.topagunea.org/
Orduan onartu ziren XXI. mendeko euskaldunon elkarteen oinarriparrak.
Txosten horretan hainbat helburu formulatu ziren formazioari dagokionez. Hemen
ideia nagusiak:
1.- Euskara elkarteek duten ezagutza metatua artikulatzea.
2.- Euskara elkarteek arian-arian egiten ari diren bideari hitza jartzea; praktika
gogoetatsua bultzatzea.
3.- Mugimenduko eragile guztien motibazioa indartzea.
4.- Ideia berrien esperimentazioa eta hedapena bultzatzea.
5.- Pertsonen arteko harremanetan sakontzea, elkarreragina areagotzea.
6.- Belaunaldien arteko erreprodukzio sistema artikulatzea.
7.- Arlo ezberdinetako ezagutzaren transferentzia egitea.
8.- Topagunearen aitzindaritzan eta elkarteekiko loturan sakontzea.
Topagunearen eta Sorguneak ikertegiaren artean adostu ziren zehaztasunez,
ELIKADURA hitzaren txapelpean bildu genituen lau lan-ardatz edo prozesuak.
2011ko uztailean onartu genituen Elikadura artikulatzeko proposamena izeneko
dokumentuaren bidez:
1. Topagunearen gogoeta-ekintza taldea artikulatzea.
2. Ezagutza berria sortzea eta partekatzea (laborategiak).
3. Ezagutzaren transferentzia artikulatzea.
4. Belaunaldi berria ahalmentzea.
Euskara elkarteek egindako bidearen diagnostiko funtsatua dago prozesu horien
oinarrian. Oinarriparrak zehazterakoan definitu ziren elikadura mailako gabezia
batzuk: Belaunez belauneko erreprodukzio sisteman sintoma kezkagarriak
agertzen dira, ezagutza soziolinguistikoaren eta balioen transmisio falta
nabarmena. Gainera, elkarteengandik hurbil dabiltzan gazteek (aisiako
begiraleak…) elkarte bizitzan aktiboago jokatzeko premia antzematen da. Bestetik,
eragile ezberdinen arteko artikulazio falta handia da; nola elkarte barruan hala
elkarteen artean.
Historikoki, ordea, gertuko eredu on imitagarrien sistemak arrakasta handia izan
du. Esan nahi dena da, albokoak egiten duena birsortuz hedatu direla elkarteak eta
programak, beraz, badirudi ildo hori interesgarria izan litekeela oraindik orain.
2. EZAGUTZAREN TRANSFERENTZIA ARTIKULATZEA
Mugimenduan parte hartzen dutenen formazioaz arituko gara txosten honetan;
goian zehazturiko hirugarren ardatzaz, hain zuzen ere. Atal honetan oinarriak
ezarriko ditugu eta hurrengoetan zehaztasunak proposatuko ditugu.
Hasteko esan dezagun premien analisi sakona egin beharko litzatekeela aurrenik.
Premien analisi horrek bere baitan jaso beharko lituzke alde batetik, transmititu
nahi diren edukien definizioa eta, bestetik, hartzaileen gabezia eta indarguneen
analisia.
Formazioaren jitea, bestalde, pragmatikoa izan behar da teorikoa bainoago, egiten
dugunaz gogoeta egiteko eta aurrerabideak proposatzeko, arrazoi teorikoez ere
jabetzen joan gaitezen. Partaideek, irakasle zein ikasle, elkarrengan eragiteko
jarreran aritzea ere desiragarria da.
Formazioari begira, lau arlo zedarritu ditugu hartzaileak eta helburuak kontuan
hartuta:
Praktika eraldatzaileak abiatzeko ikastaro trinkoak. Topagune zein
elkarteetako zuzendaritza-kideak eta langileak izango lirateke hartzaileak.
Gaur egungo egitasmoen errepasoa egiteko soziolinguistikaren argitan,
nola eta zenbateraino eragiten dugun gogoeta egiteko. Formazio bideratu
honek aukera eman behar digu Topagunearen pentsamendua eta
diskurtsoa birformulatzeko eta Oinarriparren argitara eta horren araberako
jardunbidea finkatzeko.
Formazio iraunkor eta trinkoa elkarteetako kideentzat. Formazio
berezitua Topagunea osatzen duten bazkideentzat (zuzendaritzetako
kideak eta elkarteetako langileak), formazio iraunkorraren kontzeptupean,
aurrez aurreko modalitatea zein sare bidezkoa erabilita. Herririk herri
edota eskualderik eskualde ikastaroak antolatzen hastea baino, egokiago
dirudi interesatu guztiekin talde bat osatzea. Geroago etorriko da, bada,
ikastaroak herrietara eramatearena. Gure partetik, bada, ahalegindu
beharko ginateke Huhezira (edo gune kolaboratzaileetara) biltzen taldeak.
Aztertzekoa da, orobat, udaletatik bekak lortzerik ba ote den, ikastaldiaren
amaierako proiektua herriarentzat aberasgarri izatearen truke.
Hastapen ikastaroak. Hastapen ikastaroa profesional eta bolondres sartu
berrientzat, ahalik eta sistematikoena. Aurreikuspena egin behar da ea
urtero zenbat profesional berrik beharko duten formazioa.
Laborategietan landutako gaien inguruko mintegi monografikoak.
Ezagutza berria sortu eta transmititzeko bideak jarriko lirateke martxan.
Helburua litzateke ahalik eta jende gehiena jartzea ezagutza sortzen eta
saretzen. Mugimenduaren baitan berrikuntza artikulatzeko egitura antolatu
beharko litzateke honen bidez.
Sorguneak ikertegiak hartuko du bere gain formazio eskaintzaren kudeaketa.
3. PRAKTIKA ERALDATZAILEAK ABIATZEKO IKASTARO TRINKOAK.
TOPAGUNE ZEIN ELKARTEETAKO ZUZENDARITZAKIDEAK ETA LANGILEAK.
Oinarriparren txostena onartu zenetik 2011ko kongresuan, eraldaketa da
euskararen lagunen gizarte mugimenduaren hitz gakoa. Eraldaketa abiarazteko
palanka gisa ikusten da ikastaro eredu hau.
25 bat orduko ikastaro trinkoen bidez hainbat prozesu berrikusteko gogoa piztea
eta jardunbideak zedarritzea dira helburuak. Gaiak honakoak izango lirateke:
Oinarriparren txostenean jasotako diagnostikoa eta aurrerabideak; gizarte
mugimenduen kontzeptualizazioa, osagarritasunerako lidergo-estilo eraldatzailea,
mugimenduko kide ezberdinen arteko elkarrekintza dinamikak (Durangoko
eredua), ekintzen optimizaziorako oinarri soziolinguistikoak (Azkoitiako lanketa)...
Emaleak Oinarriparren definizioan lan egin zuen Batzorde txikiko kideak eta
Sorguneak ikertegikoak izan litezke Topagune eta elkarteetako kideekin batera.
Nolanahi ere, oinarriparren txostenean jasotzen den eraldaketa asmoa gauzatuko
bada, Topaguneko kideen lidergoa eta ahalmentzea ezinbestekoa da lehen-lehenik.
Horregatik, garrantzitsua da federaziotik bertatik hastea. Beraz, lan-talde zein
zuzendaritzakideon lanaren norabideaz hausnartu eta beharrezko diren
konpetentzietan trebatzeko formazioa litzateke formazio-ardatz honen xedea.
Langintza honen norabidea izango litzateke Topaguneko jendea izatea formazio-
emale nagusiak etorkizunean.
Praktika gogoetatsuan oinarritutako metodologia erabiliko genuke eta ohiko lan
dinamikarekin bateratzeko moduko formatu trinkoak diseinatuko lirateke.
Helburua litzateke, esan bezala, federazioko lan-taldea bera izatea eraldaketarako
ikastaro modu hau elkarteetara eramango duena. Hartara, bizi izandako eraldaketa
bera izango da aktibo eta berme nagusia elkarteengan aldaketa sustatzeko garaian.
Gainera, prozesu honek balio behar du federazioarekiko aitortza eta lidergoa
handitzeko.
2011-2012 ikasturtean egin da lehen saiakera Topaguneko lan-taldearekin. Hiru
egun jarraian landu ziren bereziki gizarte-mugimendu izaera eta lidergo-estiloen
gaineko hausnarketa:
Urriak 18, asteartea: 09:30-12:00 Topagunearen ekimenen irizpide soziolinguistikoez 12:30-14:00 Topagunearen izaeraz eta garrantziaz
Urriak 19, asteazkena: 09:30-10:30 Topagunearen aitzindaritzaz 10-30-12:00 Topagunearen ekimenak hiztunen tipologiaren arabera: hobetzeko bideak 12:30-14:00 Euskaldunon elkarteen ekimenen azterketa, gizarte-mugimendu garen aldetik
15:30 -17:30 Federazioko eta elkarteetako langileen aitzindaritza-ereduaren azterketa
Urriak 20, osteguna:
9:30-14:30 Euskaldunon elkarteetako harrera plana egiteko edukiak diseinatu 15:30 -17:30 Saioetan egindakoaren / lortutakoaren ondorioak
Baliagarria izan bada ere, bigarren urrats bat eskatzen du ikasturte honek:
Topagunearen egungo kudeaketa planaren optimizazioa diseinatzeko dinamika
abiaraztea eta antolaketa eredua berrikustea.
Interesgarria izan liteke Tokikomen eraketarako uztailean egingo diren tailerretan
ere honelako ikastaro-mintegia egitea hedabideen arloko pertsonekin. Honek
aukera emango luke Tokikomen eraketa operatiboaz gain, Oinarriparretan
jasotako ikuspegi berria txertatzeko erakundetze berrian.
Aipagarria da, era berean, Durangon egin den ahalegina arlo ezberdineko kideak
batzeko eta ikuspegi berriaren araberako norabide aldaketa egikaritzeko.
4. FORMAZIO IRAUNKOR ETA TRINKOA ELKARTEETAKO KIDEENTZAT.
Hauxe da modu iraunkorrean eskainiko litzatekeen eskaintza akademikoa.
Helburua litzateke euskararen aldeko mugimenduan aritzeko prestakuntza
espezializatua eskuratzea. 40 bat plaza eskainiko lituzke Mondragon
Unibertsitateak, Topagunearekin elkarlanean eskainiko lukeen aditu-tituluan.
Gizarte-mugimenduetako kideek izango dute lehentasuna baina zabalik egongo da
arloko bestelako kideentzat ere.
Ikasturte batean azarotik maiatzera hamabost eguneroko klase presentzialak eta
tarteko asteko lan ez-presentzialak konbinatuko dira (100 ordu). Bestetik, hiru
mintegi trinko egingo lirateke ikasturte berean (60 ordu). Horrez gain, ikasleek
elkartearentzat onuragarria izango den proiektu bat landuko luke (80 orduko
dedikazioa). 240 orduko dedikazioa guztira.
Gaiei dagokienez, euskararen aldeko mugimenduan aritzeko oinarriak landuko
dira: euskararen aldeko mugimenduaren diakronia, oinarri soziolinguistikoak,
hizkuntz ekologia, herri-mugimenduen ezaugarriak eta gizarte-aldaketak...
Euskara elkarteen mugimenduko kideak eta Huheziko irakaslegoa izango litzateke
irakasletzan arituko direnak. Azken kasu honetan Huhezik eskaintzen dituen beste
bi graduondokoen eduki eta euskarriak erabiliko lirateke: Euskal Kulturgintzaren
Transmisioa aditu-titulua eta Garabide elkartearekin batera programatzen duen
Título Experto en la Revitalización de Lenguas y Culturas Originarias.
Euskara elkarteetako profesionalak izango lirateke hartzaile nagusiak, esan bezala,
eta helburua litzateke elkartearentzat ez ezik herrirako ere interesgarria izango
den proiektu bat garatzea. Horregatik, udal euskara zerbitzuekin eragiletza modu
sendoa hitzartzea proposatuko genuke. Honela, dagokion euskara teknikaria
proiektu horren diseinu, jarraipen eta ebaluazio fasean kide bihurtuko litzateke.
Era berean, urtero kide ezberdinen matrikula bekatzeko hitzarmengintza landuko
litzateke. Era honetara ziurtatuko litzateke ikasle profesionalak landuko duen
proiektua herriko hizkuntza komunitatearentzako baliagarria izango dela eta
formazioan egindako inbertsioak balioko duela prokomuna den eragiletza
indartzeko. Uste dugu ikastaroaren matrikula hein handi batean elkartearen
eskutik joan beharko litzatekeela (ez %100 ikaslearen eskutik) hitzarmengintza
modu horren bidetik.
Bestetik, ikastaro honek oihartzun interesgarria izan lezake hizkuntz
komunitatean baldin eta Tokikom bihurtuko bagenu bozgorailu. Tokiko hedabide
guztiak izan litezke oihartzun horren zabaltzaile herritarren artean. Honela,
produktu berezitu bat egin liteke ikastaroa aitzakiatzat hartuta.
5. HASTAPEN IKASTAROA (HARRERA-PLANA).
Euskara Elkarte batean bai kide profesional gisa, bai bolondres moduan hasten den
pertsonak ezagutu beharreko gutxienekoak zeintzuk dira? Galdera horri erantzun
nahiko lioke ikastaro honek.
Eduki horiek definitzeko ariketa egin genuen Topaguneko lan-talde eta
zuzendaritzakideak eta Sorguneak ikertegikook urrian egindako ikastaroaren
baitan. Hiru ardatz nagusi aurreikusi genituen:
1. Euskara Elkarteen Mugimenduaren ibilbidea.
2. Gaur egungo ildoa: Oinarriparrak.
3. Egungo eskuhartze soziolinguistikoa
Pentsatu beharko genuke nola jar litezkeen kide hauek mugimenduarekin
harremanetan. Duda barik, herriko eragileak izango dira lehentasunezkoak baina
haratagoko formulak pentsa litezke. Gune eguna izan liteke espazio egoki bat,
udako ikastaro modukoak...Harrera-plan horren alderdi batzuk eskain daitezke
Abadino edo Eskoriatzan... On line- plataformak eskain litezke.
Bestetik, elkarteen eskura jar litezke ikusentzunezko euskarri didaktikoak
errazago bidera dezaten transmisio lana.
6. LABORATEGIETAN OINARRITUTAKO MINTEGI MONOGRAFIKOAK.
Sarreran aipatu dugun bezala laborategiak dira ezagutza berria sortzeko erabiliko
diren bitarteko nagusiak. Gaien arabera antolatuko dira Garapen Talde ezberdinak
eta horietan garatuko duten ikerketa-ekintza ziklotik ondorioztatutako gako
nagusiak transmitituko dira aldiro-aldiro.
2011-2012 ikasturtean aisiako begiraleak elkarteratzeko laborategia abiatu da.
Ziklo horren bukaeran, 2012-2013 ikasturtearen bukaeran gure Udako
Unibertsitate txiki moduko bat antolatuko genuke emaitzak sozializatzeko asmoz.
Helburua litzateke urtero antolatzea halako hitzordu bat mugimenduko kideok
izan ditzagun elkar elikatzeko abagunea. Laborategien dinamika partekatzea balitz
ere helburu nagusia, aditu-tituluan aurkeztutako proiektu onenen aurkezpenak ere
egin litezke.
Aurtengo ikasturtean Tokikomen sorrerak eskatzen du halako topaketa bat
uztailan eta izan liteke, bere berezitasunak izanda ere, lehen Udako Unibertsitate
horren lehen harria jarriko duena.
Nolanahi ere, laborategien antolaketan aurreikusten dugun moduaz esan dezagun
zerbait gehiago:
Garapen taldean 10 bat lagun izango dira eta ikerketa-ekintza zikloa garatu ostean,
sozializio fasean gehienez ere 25 kide aurreikusten ditugu. Sozializazio fase
horretan irizpide geografikoa erabiliko litzateke eta elkarteen aitzindaritzak
kontuan hartuko dira aukeraketa egiterakoan.
7. AZKENIK
Arlo metodologikoa utzi dugu bukaerarako. Labur bada ere, garrantzitsua irizten
diogu oinarrizko zertzelada batzuk emateari. Izan ere, egiten dugunaren gaineko
gogoeta da sarri falta izan zaiguna. Balio beza arlo honek ere egiten dugun hori
balioan jartzeko.
Labur esan dezakegu guk egin ohi duguna ikerketa-ekintza partehartzailea dela eta
gaur egun zientzia sozialetan nagusi den tradizio dialektikoan kokatzen dela; berak
integratzen baititu tradizio positibista eta tradizio hermeneutikoa.
Ikuspegi dialektiko-kritikoak errealitatearen eraldaketan esku-hartzea du helburu
nagusia. Bere prozedurak aztertzaile-partehartzaileak dira. Subjektu kolektiboen
interesak eta beharrak hartzen ditu kontuan. Aktore sozialen auto-diagnostikoan
oinarritzen da eta ekintza-hausnarketa-ekintza zikloak burutzen ditu, ezagutza eta
ekintza uztartzen ditu.
Proposamen honetan jasotako ardatz guztiek hartzen dute metodologia hori
kontuan, bai eraldaketa hasteko ikastaro laburrak, bai proiektugintzan oinarrituko
diren aditu-ikastaroak, bai harrera-planak, bai laborategietan sortutako
ezagutzaren transmisio bideak. Gakoetako bat da mugimenduko eragilea bera
izatea ikerlari zein formatzailea; alegia, jakintza irekia eta formazioaren
autogestioa bultzatzea; “Adituaren” boterea banatzea “Arituen” artean.