Intervención Ángel Riego González, Alcalde de Carreño

1

ACTO INSTITUCIONAL 33 ª SELMANA DE LES LLETRES ASTURIANES – CANDÁS, 2 DE MAYO DE 2012

PRESENTACIÓN ASISTENTES

Buenes tardes a toos y toes; como alcalde d’esta villa mariñana, lléname de satisfacción y arguyu davos la bienvenida esta tarde a esti actu conmemorativu col que’l Conceyu de Carreño quier sumase a la celebración de la 33 edición de la Selmana de les Lletres Asturianes; unos actos que celebren ún de los elementos más significativos de la nuestra realidá como pueblu, la nuestra llingua y qu’ esti añu, rinden homenaxe a un gran escritor comprometíu cola so xente y la so cultura, Benito Antonio de l’Auxa.

Contamos pa ello col Director Xeneral de Política Llingüística, D. Alfredo Álvarez Menéndez y el profesor y escritor D. Xuan Busto Cortina, a los que recalco la bienvenida y agradezo la so presencia.

Darréu d’esto cederé la palabra a D. Alfredo Álvarez Menéndez, Director Xeneral de Política Llingüística del Principáu d’Asturies.

INTERVENCIÓN DEL DIRECTOR XENERAL, D. Alfredo Álvarez Menéndez.

MI INTERVENCIÓN:

Como dicía al entamu d’esti actu, ye un placer pal Conceyu de

Carreño acoyer la XXXIII (Trentésima tercera) edición de la Selmana de les Lletres Asturianes qu’esti añu se dedica, ente otros, al escritor candasín Benito Antonio de l’Auxa. Faciendo un poco d’historia, yá nel sieglu XVIII alcontramos el primer investigador esmolecíu pola actividá intelectual del Principáu: el tamién candasín Carlos González de Posada, amigu y collaciu de Xovellanos. Nes dos obres principales de Posada, “Memorias Históricas del Principado de Asturias y Obispado de Oviedo” (1.794) y la “Bibliotheca Asturiana”, l’autor enfótase n’ilustrar a la so xente y despertalos al mundu con noticies actuales y necesaries sobre la so tierra y la so patria, noticies hasta entós casi desconocíes; con ello intentaba cambiar la imaxe de país incultu y atrasáu que d’Asturies se tenía

Intervención Ángel Riego González, Alcalde de Carreño

2

tanto dientro como fuera. Ente esti mesmu grupu d’intelectuales asturianos que van intentar sacar a Asturies del atrasu económicu y cultural nel que taba, y que van dar les bases del futuru desarrollu del país, alcontramos a otru candasu, Benito Antonio de l’Auxa, ún de los escritores que Xuan Busto inclúi dientro de lo qu’él noma como “Círculu Poéticu de Candás” tertulia que se facía en Carrió, en casa de los Condes de Peñalba, pa finales del sieglu XVIII. Resulta evidente qu´Auxa tien un perbonu conocimientu del bable literariu. Nuesu autor disponía dé una ventaya: Cuatro de los cinco autores que se sabe escribierun enantes d´él yeren del conceyu de Carreño: Bernardo Reboredo, cura d´El Pieloro, Xuan Fernandez Porley “Xuan de la Candonga” y José Nicolás Torano de la Puerta, y perriba toos ellos, Antón de Marirreguera. La mayoría de les obres d’estos autores ilustraos siguen les buelgues del neoclasicismu mecíu cola imitación de dellos modelos asturianos. En munches d’elles ye patente la influencia d’Antón de Marirreguera – primer poeta conocíu de la lliteratura asturiana; casi tolos testos recueyen el mesmu tonu ente críticu y humorísticu qu’usara’l poeta de Carreño y al que los escritores del Mediu Sieglu imiten con maña más o menos acertada. Esti espíritu críticu, de llucha contra cualquier principiu d’autoridá, ta recoyíu perfectamente nes obres de los autores qu’esti añu, y pa la 33 edición de la Selmana les Lletres homenaxamos. Pue dicise entós que la lliteratura ye una manera de llegar a conocer la realidá y la verdá del mundu; que la pluma y el papel definen la identidá de los pueblos nel respaldu de miraes suxetives que puen llegar a ser más ecuánimes que la propia historia vivida. Carreño ye parte d’esta historia y como vemos, tien una tradición lliteraria en llingua asturiana bien abondosa, una lliteratura que trata d’alcontrar la esencia del pueblu asturianu usando la llingua asturiana como espeyu del pensamientu y d’esa realidá que vivimos. Esti vínculu ente realidá, pensamientu y llingua ye una materia irrenunciable nel procesu de construir con éxitu una sociedá asturiana más igualitaria, llibre y integradora. Pa ello, hai que facer una política llingüística motivadora que se nutra del marcu llegal creáu, y asegure los pegollos

Intervención Ángel Riego González, Alcalde de Carreño

3

afayadizos pa que la llingua, (va tiempu arrequexada a la fala de les cases y los chigres), nes sos vertientes más informales y populares de los que la usen con regularidá y facilidá nes sos formes orales, algame’l nivel d’un idioma modernu y válidu al altor de la calidá de la ciudadanía. Dende’l Conceyu de Carreño somos conscientes de que tou compromisu de respetu pola igualdá de les llingües ha tener unos oxetivos claros: amás de garantizar l’usu d’un idioma, hai que reforzalu, incrementalu pasu ente pasu, sía na vida municipal como na vida social del nuestru conceyu. Pa ello, el consistoriu de Carreño, coles actuaciones que lleva años desarrollando en materia llingüística, collabora pa reducir el billingüismu desequilibráu nel que ta inmersa Asturies, siendo conscientes del llabor que tovía mos queda por facer. Sin más, despídome agradeciendo la presencia a los ponentes, participantes y asistentes a la 33 (Trentésima Tercera) Selmana de les Lletres Asturianes nesti conceyu a la vera la mar que güei afita’l so papel na lliteratura asturiana con esti homenaxe a ún de los nuestros. Gracies.