a psicomotricidade xoga un papel moi importante no ... · neno/a, xa que inflúe directamente sobre...
TRANSCRIPT
A psicomotricidade xoga un papel moi importante no crecemento do
neno/a, xa que inflúe directamente sobre o seu desenvolvemento
intelectual, afectivo e social.
Ademais, a través da psicomotricidade os nenos/as adquiren, entre
outros aspectos, o coñecemento do esquema corporal, o dominio do
equilibrio, a coordinación global e segmentaria, o control da respiración,
a orientación espacial, a definición da lateralidade...
Agora que xa podemos saír á rúa a pasear e xogar, debemos aproveitar
ao máximo estes momentos. Correr, saltar, patinar, montar en bici,
xogar co balón, co aro, coa corda... Tendo sempre moi presentes as
medidas de protección e hixiene recomendadas.
Non obstante, podemos complementar estas saídas con outros
exercicios dentro da casa, e é por iso que papás e mamás podedes
contribuír a que os vosos fillos e fillas continúen desenvolvendo as
habilidades motrices, expresivas e creativas a través do corpo, e
adquiran unha imaxe axustada e positiva de si mesmos/as realizando
pequenas actividades sinxelas, significativas e divertidas.
Por iso, pasamos a continuación a expoñer unha serie de propostas e
xogos para que podades poñer en práctica en familia.
Todo o mundo....
a mover ese corpo!!!
OS ANIMAIS MANDAN
O adulto di as consignas que propoñen os diferentes animais e o
neno/a debe levalas a cabo.
IMITANDO ANIMAIS
Sen empregar ningunha consigna previa, como na anterior actividade,
simplemente xogamos a imitar o movemento dalgúns animais. Por
exemplo: reptamos como serpes, camiñamos como os cangrexos,
saltamos como as rás.... Poden pensar eles mesmos diferentes animais,
ir imitando os seus movementos e que o adulto trate de adiviñar de que
animal se trata.
XOGO DAS CORES
Empregaremos diferentes obxectos, xoguetes, pezas de construcións,
bonecos... cousas que teñamos pola casa de diferentes cores (azuis,
verdes, amarelas, vermellas....).Colocarémolas repartidas por un espazo
o máis despexado posible doutros obstáculos. O neno/a deberá
desprazarse ata os diferentes obxectos seguindo as consignas dadas
polo adulto. Por exemplo: saltando cos pés xuntos iremos ao verde,
reptando ao azul, á pata coxa ata o amarelo... podemos marcar unha
liña de saída e saír sempre dende aí ou ben ir duns obxectos a outros;
dependerá un pouco do espazo do que dispoñades.
INTRUCIÓNS CORPORAIS
O adulto dará unha serie de consignas que o neno/a debe facer.
Podemos ir complicando os mandatos segundo a idade. Algúns
exemplos:
Tocar coas
mans os
ombros
Tocar coas
mans os
xeonllos
Tocar coas
mans os pés
Levantar a
man dereita,
despois a
esquerda
Tocar coa
man dereita a
perna dereita
Tocar coa
man esquerda
o ombro
esquerdo
Xuntar os
dous cóbados
Co dedo índice
dunha man
tocar o
maimiño da
outra
XOGO DO ESPELLO
Colocámonos un fronte a outro. O adulto realizará varios movementos
corporais (tocar a cabeza, tocar un xeonllo, levantar un brazo ou unha
perna...) e o neno/a terá que imitar eses movementos. E despois ao
revés, o neno/a irá tocando e nomeando as partes do corpo e o adulto
irá imitando o que el/ela faga.
CADEA DE MOVEMENTOS
Unha persoa fai un movemento ou son co corpo e o outro, debe repetilo
e engadir un novo e así sucesivamente. (Exemplo: palmada, palmada-
golpe co pé no chan, palmada-golpe co pé no chan- mans na cabeza...).
ESTATUAS MUSICAIS
Poñemos música e movémonos libremente. Nun momento dado, o
adulto parará a música e o neno/a debe quedar quieto como unha
estatua. Volvemos a darlle ao play e a moverse e bailar de novo!
SEGUIMOS O RITMO
O adulto marcará un ritmo máis rápido/lento ou ben máis forte/suave
e o neno/a deberá moverse seguindo ese ritmo. De que forma? Pois
camiñando máis rápido ou lento ou ben pisando máis forte ou máis
suave. (Podemos empregar algún instrumento de percusión para marcar
o ritmo se temos na casa, se non, podemos golpear unha caixa ou
similar ou simplemente dar palmas).
ONDE SOA?
O neno/a levará os ollos tapados cunha tea ou pano que teñamos na
casa. O adulto separarase e fará sons coa axuda dalgún obxecto ou
mesmo dando palmas. O neno/a deberá achegarse seguindo
unicamente o sentido do oído. Se empregamos obxectos podemos xogar
tamén a adiviñar que obxecto é o que facemos soar. *Precaución:
procuraremos que o espazo no que vaiamos xogar non teña moitos
obstáculos para evitar chocar contra eles.
PÉS EN EQUILIBRIO
Os nenos/as estarán cos dous pés apoiados no chan. Cando o adulto
reproduza un son, deberán erguer un pé do chan e tratar de manter o
equilibrio durante uns segundos. A continuación repetir co outro pé. Se
vemos que o neno/a domina o exercicio cos ollos abertos, podemos
aumentar a dificultade e xogar a facelo cos ollos pechados.
CAMIÑAMOS POLAS LIÑAS
Pegar no chan diferentes percorridos con cinta adhesiva que deberán ir
seguindo sen saírse. Podemos facer os percorridos de distinta forma,
camiñando, saltando, á pata coxa, de puntillas, de talóns... Podemos
aumentar a dificultade tratando de levar co pé unha pelota.
CARREIRAS DE EQUILIBRIOS
Marcamos no chan cunha cinta adhesiva tea ou pano unha liña de
saída e outra de chegada. Poremos sobre a cabeza un obxecto ( por
exemplo un saquiño con fariña que podemos fabricar na casa, unha
boliña de plastilina, un rolo de papel hixiénico...) e imos dunha liña á
outra tratando de que non se nos caia o obxecto.
TOCANDO CORES E NÚMEROS
Facemos uns círculos en folios, poden ser xa de cores ou se non
brancos e pintarémolos. Pegámolos con cinta sobre unha superficie
vertical, unha parede un moble... Marcamos unha liña de saída con
cinta adhesiva, un trapo ou tea. O adulto dirá unha cor e o neno/a ten
que ir a tocar o círculo que sexa desa cor.
Podemos engadirlle a eses círculos os
números que os nenos/as coñecen.
Podemos tamén variar o percorrido ata o
círculo, facelo correndo, facelo a saltiños,
de puntillas, de talóns, á pata coxa...
SALTO SEN PARAR
Faremos no chan unha figura como o círculo ou o cadrado. Podemos
debuxala ou ben axudarnos de cinta adhesiva ou teas/panos para
marcar os diferentes lados. O neno/a comezará dentro,
e o adulto irá dando diferentes consignas para que o
neno/a salte. Pode ser a forma máis sinxela para os
máis cativos dentro/fora. Ou ben ir aumentando esa
dificultade dicindo diante/detrás, esquerda/dereita só
con esas dúas consignas ou ben mesturar todas as
opcións.
Podemos tamén simplemente marcar liñas separadas por unha
distancia e ir saltando sen pisar esas liñas. Coma sempre, podemos
saltar cos pés xuntos, separados, á
pata coxa, apoiando un so pé alterno
en cada espazo, cara atrás, facer o
percorrido en zigzag...
TERRA E AUGA
Empregamos cinta adhesiva, unha corda, tea ou pano que teñamos na
casa e estirámolo para formar unha liña no chan. A un lado da liña
chamarémoslle terra, ao outro lado auga (será previamente acordado
entre os participantes). Xogaremos a dicir terra e auga indistintamente
e deberemos saltar ben cara a terra ou ben cara a auga segundo
corresponda. Poderemos aumentar a dificultade saltando á pata coxa
ou saltando de dúas maneiras diferentes en cada caso (Exemplo: pata
coxa cara a auga, cos pés xuntos se imos cara a terra).
SALTANDO PEGADAS
Facemos pegadas coa axuda de cartolina, cartón ou folios. Colocámolas
en diferentes posicións. Saltamos dunhas a outras tendo en conta o xiro
que debemos facer para colocarse ben. Podemos tamén alternar o salto,
un pé, dous pés.
LANZAMOS AROS
Precisamos un soporte de papel de cociña ou se non o propio tubo de
cartón (neste caso deberemos suxeitalo á mesa ou ao chan para que
non se nos caia). Coa axuda dalgúns
cartóns que teñamos na casa facemos
círculos cunha apertura no centro e
dende unha distancia determinada
lanzamos eses círculos para que entren
polo tubo. Podemos pintar os círculos e
o tubo como máis non guste para que
queden máis bonitos.
LANZAMOS ARAÑAS
Elaboramos unha tea de araña con velcro e
con feltro ou pompóns de cores facemos as
arañas. Consiste en lanzar as arañas, dende
unha distancia previamente marcada,
tratando de chegar ao centro da tea de araña.
LANZA E METE GOL
Cunha pelota pequena ou un globo que podamos ter pola casa e a
axuda dunha caixa ou cubo deitado no chan
crearemos a nosa portería. Marcamos unha
liña dende a que lanzar e tratamos de meter
gol. Podemos poñer a caixa de pé e xogaremos
a encestar. Ademais podemos aumentar a
dificultade marcando diferentes liñas a
diferentes distancias dende as que lanzar.
XOGO DA PELOTA/VASO
Empregamos o recipiente dun iogur, unha pelota
pequena que podemos facer con periódico, papel de
aluminio ou mesmo empregar a tapa dunha botella e
un anaco de lá ou corda. Facemos un buraco por
baixo do iogur, metemos a lá facendo un nó por
dentro. Deixamos unha lonxitude de lá conveniente
(canto máis longa máis dificultade) e ao final
enganchamos a pelota. O xogo consiste en tratar de
meter a pelota dentro do recipiente de iogur.
DUN PÉ AO OUTRO
Precisamos dúas caixas ou recipientes algo grandes.
Un dos recipientes deixarémolo baleiro e no outro
meteremos diferentes obxectos que teñamos: peluches,
algún xoguete, balóns, globos... podemos xogar con
diferentes tamaños. O neno/a deberá pasar os
obxectos dunha caixa á outra empregando só os pés.
XOGO DOS ROBOTS
Unha persoa sae da habitación na que se realiza o xogo. O resto de
participantes son robots, e deberán acordar un lugar do corpo onde ao
tocar, o robot se apague (Exemplo: nun ombro, nun xeonllo, nunha
man...) Unha vez decidido, entra a outra persoa e mentres os robots
camiñan, deberá ir tocando ata adiviñar onde se atopa o “botón” que os
fai parar e conseguir así apagar a todos os robots.
TÚNELES DE CORES
Creamos pequenos túneles coa axuda de folios
(poden ser brancos ou de cores). Pegamos con celo
as esquinas ao chan. Lanzamos pequenas pelotas
(coa man ou co pé) intentado que pasen polos
túneles.
MARIOLA
Para evitar pintar no chan, empregaremos cinta
adhesiva, coa que debuxaremos o tradicional
xogo da mariola. O neno/a colocarase detrás do
primeiro número e lanzará un obxecto (algo
plano para evitar que rode). Onde caia
denomínase “casa” e nese cadrado non se pode pisar. O neno/a recorre
o circuíto saltando a pata coxa nos cadrados ou cos pés xuntos nos
cadrados dobres. O obxectivo é pasar o obxecto de cadrado en cadrado
ata chegar ao 10 e despois volver á saída.
XOGO DOS BOLOS
Reciclamos botellas que teñamos na casa. Podemos
decoralas como máis nos guste e engadiremos un
número a cada unha delas. Facemos unha marca
no chan dende onde lanzar e coa pelota trataremos
de tirar todos os nosos bolos.
CIRCUÍTO XEOMÉTRICO
Coa axuda de cinta adhesiva, debuxando, con cordas
ou teas representamos diferentes figuras xeométricas
no chan. Facemos o mesmo debuxo nun folio e
sinalamos con frechas o percorrido que os nenos/as
deben realizar. Podemos facer diferentes rutas e como
sempre, de diferentes formas: saltando cos pés xuntos,
alternos, á pata coxa...
Podemos combinar todas estas propostas con outros pequenos circuítos
aproveitando o mobiliario da casa, empregando por exemplo cadeiras
polas que pasar por enriba, mesas polas que pasar por baixo, coxíns
que saltar... Por suposto, outros moitos xogos populares como o xogo
das cadeiras musicais, o escondite ou escondite inglés... e sobre todo
poñer música e bailar, de forma libre, creando pequenas coreografías
xuntos... e aproveitar esta situación excepcional que nos tocou vivir
pasando bos momentos en familia.
EXERCICIOS PARA A RELAXACIÓN
Incluímos a continuación algunha proposta de relaxación que podedes
levar a cabo despois de facer os diferentes xogos.
SOMOS ÁRBORES
Cos pés quietos no chan os nenos/as imitarán o crecemento dunha
árbore dende que sae do chan (terán que estar agochados) ata que se
converte nunha árbore grande chea de pólas (de puntillas e cos brazos
estirados) que se irá balanceando como cando o vento move ás polas.
Podemos acompañar a actividade de música suave e relaxante.
COLLO E SOLTO AIRE
Deitados no chan boca arriba e cos ollos pechados, collemos aire polo
nariz (como se quixésemos ulir unha flor), aguantamos durante uns
segundos o aire e a continuación soltamos todo ese aire pola boca moi
suave (como se estivésemos soprando unha vela). Para crear un
ambiente e clima máis cálido, podemos apagar as luces e acompañar a
actividade con música suave de fondo.
IOGA
Practicar ioga tamén ensina cousas acerca do corpo, a movernos máis
libremente e con maior facilidade e conciencia, axudando ademais a que
se volvan máis fortes e flexibles. Ensínanos tamén a respirar mellor,
empregar a nosa enerxía de maneira máis eficaz, a calmar a mente,
mellorar o noso equilibrio e en definitiva a controlar mellor o noso
corpo.
A continuación propoñémosvos unha serie de posturas sinxelas que
podedes poñer en práctica:
Deixámosvos tamén uns enlaces para que podades facer ioga e
mindfulness con vídeos axeitados para os máis pequenos/as.
https://www.youtube.com/watch?v=MI1S5rM0ou0
https://www.youtube.com/watch?v=jMOZz7GHaog
https://www.youtube.com/watch?v=sIbdc-lNXjU
https://www.youtube.com/watch?v=sEztAX_GUcQ
https://www.youtube.com/watch?v=feJdmeEV9YQ
https://www.youtube.com/watch?v=OHqG-O1g5Nc
MOITO ÁNIMO E UN SAÚDO FAMILIAS!!